Son illərdə smartfonlar və geyilə bilən cihazlar vasitəsilə addımlarımızı izləmək çox asanlaşıb. Bir çox insan gündə 10.000, hətta 20.000 addım atmağa çalışsa da, bəzi insanlar bu ənənəvi məqsəddən uzaqlaşıb daha təsirli və vaxt qazandıran alternativlər axtarır.
E-saglam.az-ın məlumatına görə, Yaponiyada yaranan və dünyaya yayılan yeni gəzinti texnikası — 3-3 yerimə metodu buna ən yaxşı nümunədir. Bu üsul xüsusilə evdən işləyənlər üçün ideal olub, daha az vaxt sərf etməklə sağlamlığı qorumağa kömək edir.
3-3 Gəzinti Məşqi Nədir?
Bu texnika, Yaponiyanın Şinşu Universitetindən Prof. Dr. Şizue Masuki və Prof. Hiroshi Burun tərəfindən hazırlanıb. 3-3 gəzinti metodu, addım sayına deyil, sürətə və ritmə diqqət yetirir. Təcrübə sadədir:
-
3 dəqiqə sürətli yerimə
-
3 dəqiqə yavaş yerimə
Bu dövr 30 dəqiqə ərzində 5 dəfə təkrarlanır.
Bu metod, klassik "addım sayını artırmaq" yanaşmasından daha çox ürək-damar sağlamlığını və əzələ inkişafını ön plana qoyur. 3-3 gediş metodunun yüksək intensivliyi və interval təkrarı, sürətli gəzintidən daha effektiv nəticələr verə bilər.
Elm və faydaları
2007-ci ildə aparılmış bir araşdırmaya görə, bu metodu tətbiq edən orta yaşlı şəxslər daha aşağı qan təzyiqinə, daha güclü bud əzələlərinə və daha yaxşı aerobik qabiliyyətə sahib olublar. Araşdırma göstərib ki, bu metod, orta sürətli gəzinti ilə müqayisədə daha təsirli nəticələr verir.
Gündəlik həyatda necə tətbiq edilir?
Yazıçı Amy Glover, HuffPost UK ilə öz təcrübəsini bölüşərək, 3-3 yerimə metodunun ona necə kömək etdiyini anlatdı. Həvəsli qaçışçı və idman zalı ilə məşğul olmasına baxmayaraq, evdən işləyən Glover 10.000 addım atmaqda çətinlik çəkirdi. Lakin, 3-3 metodunu kəşf etdikdən sonra daha az vaxtda daha çox idman etməyə başlayıb və bundan daha çox zövq aldığını deyir. Onun orta addım sayı 8000-dən yuxarı qalxıb.
Glover deyir: "Bunun yalnız yarım saat çəkəcəyini bilmək, işə başlamaq üçün zehni maneələri aradan qaldırır. Üç dəqiqə sürətli, üç dəqiqə yavaş gəzinti yanaşması məşqi daha sürətli və daha zövqlü edir".
Yapon 3-3 yerimə texnikası, xüsusilə məşğul olanlar, evdən işləyənlər və ya adi gəzintidən sıxılanlar üçün mükəmməl bir alternativdir. Vaxtından daha səmərəli istifadə etmək istəyənlər üçün bu üsul həm qısa, həm də çox faydalıdır.
Mütəxəssislər vurğulayırlar ki, orta intensivlikdə mütəmadi gəzinti ürək sağlamlığı, əqli tarazlıq, əzələ və sümük gücü, osteoporozun qarşısının alınması kimi sahələrə müsbət təsir göstərir. Bu metod həmçinin, monoton "addım sayı" hədəflərini izləyənlər üçün elmi əsaslandırılmış və asanlıqla həyata keçirilə bilən bir alternativ təqdim edir.
Tərcümə: Könül Oruc
