Son illərdə uşaqlarda bağırsaq qurdlarına yoluxma halları artmaqdadır. Həkimlərin sözlərinə görə, qurd xəstəliyi (helmintoz) adətən gigiyena qaydalarına riayət olunmadıqda yaranır və xüsusilə məktəbəqədər yaşlı uşaqlarda daha çox müşahidə olunur.
E-saglam.az xəbər verir ki, infeksiyanın əsas əlamətləri arasında iştahsızlıq, qarın ağrısı, arıqlama, diş qıcırdatma, yuxusuzluq və anal nahiyədə qaşınma göstərilir. Bəzi hallarda uşaqlarda halsızlıq və dəri solğunluğu da müşahidə edilir.
Həkimlər bildirirlər ki, qurd yumurtaları çirkli əllər, torpaq, yaxşı yuyulmamış meyvə-tərəvəz və ev heyvanları vasitəsilə orqanizmə daxil ola bilər. Buna görə də uşaqlarda əl yuma vərdişi, qida gigiyenası və təmizlik qaydalarına ciddi əməl olunması vacibdir.
Mütəxəssislər valideynlərə ildə ən azı bir dəfə uşaqları profilaktik müayinədən keçirməyi və həkim məsləhəti ilə antiparazitar preparatlar qəbul etdirməyi tövsiyə edirlər.
Qarşısının alınması yolları:
- Əlləri yeməkdən əvvəl və sonra sabunla yumaq
- Meyvə və tərəvəzləri yaxşıca təmizləmək
- Dırnaqları qısa saxlamaq
- Uşaq oyuncaqlarını və yataq dəstlərini mütəmadi təmizləmək
Uşaqlarda qurd xəstəliyinin vaxtında aşkarlanması və müalicəsi böyümə, immunitet və ümumi sağlamlıq üçün son dərəcə vacib sayılır.
Nəzrin Abbas
