Endokrinoloq və diyetoloq Mariya Stelmax hesab edir ki, nənə və babalarımızın həyat tərzi müasir “sağlam qidalanma” trendlərindən daha təbii və faydalı olub.
E-saglam.az xəbər verir ki, o, müsahibəsində yaşlı nəsillərin sağlamlıq sirlərini bölüşüb.
Həkimin sözlərinə görə, ən vacib qayda ölçülü yemək və həddindən artıq yeməməkdir. “Nənələrimiz süfrəyə hər şeyin bol olmasını sevsələr də, özləri az yeyərdilər. Çünki bədənə lazım olduğundan artıq yük düşəndə maddələr mübadiləsi pozulur”, – deyə Stelmax bildirib.
O əlavə edib ki, keçmişdə insanlar fast food yemirdilər, əksinə, təzə tərəvəzlər, taxıllar və mayalanmış süd məhsulları ilə qidalanırdılar. “Nənələr şorbanı paketdən deyil, təzə tərəvəzlə bişirirdilər. Bu həm maddələr mübadiləsini gücləndirirdi, həm də bədəni vitaminlərlə təmin edirdi. Mövsümi məhsullar insulin müqavimətinin qarşısını alır və orqanizmdə iltihabı azaldır”, – deyə həkim vurğulayıb.
Stelmax qeyd edib ki, təbii və sadə qidalanma qalxanabənzər vəzin hormonlarını tənzimləməyə kömək edir və maddələr mübadiləsini sabit saxlayır. Onun fikrincə, mövsümə uyğun meyvə-tərəvəz yemək immunitetin güclü qalmasının ən asan yoludur.
Diyetoloq onu da xatırladıb ki, keçmişdə insanlar daha çox fiziki aktiv idilər – paltar yuyur, bağda işləyir, piyada gedirdilər. “Bu cür gündəlik fəaliyyət orqanizmdə endorfin istehsalını artırır, stress hormonu olan kortizolun səviyyəsini azaldır və həm fiziki, həm də ruhi sağlamlığı gücləndirir,” – deyə o bildirib.
Tərcümə: Könül Oruc
