Badam ürək sağlamlığı üçün ən faydalı qidalardan biridir.
E-saglam.az xəbər verir ki, onun tərkibindəki E vitamini, sağlam yağ turşuları, maqnezium və antioksidantlar damarların elastikliyini qoruyur, pis xolesterolun səviyyəsini azaldır və ürək-damar xəstəliklərinin qarşısını almağa kömək edir. Mütəxəssislər bildirirlər ki, gündə təxminən 25-30 qram, yəni bir ovuc badam yemək ürəyin fəaliyyətini gücləndirir və qan dövranını yaxşılaşdırır.
Badam həmçinin qan təzyiqinin tənzimlənməsində və iltihabların azalmasında mühüm rol oynayır. Onun tərkibindəki doymamış yağlar və liflər bədəndəki yağ balansını qoruyur, şəkər səviyyəsini stabilləşdirir və enerji verir. Duzsuz və qovrulmamış formada qəbul edildikdə daha çox fayda göstərir.
Mütəxəssislər ürək xəstəliyi riski olanlara, stress altında çalışanlara və fiziki aktiv insanlara gündəlik rasiona badam daxil etməyi məsləhət görürlər. Bu kiçik, amma güclü qida həm ürəyi qoruyur, həm də ümumi sağlamlığı dəstəkləyir.
Könül Oruc
