Tibbdə bədən şəkilləndirmə üsullarında inqilabi yenilik baş verib.
E-saglam.az xəbər verir ki, CBL-514 adlı yeni preparat liposaksiya və digər cərrahi əməliyyatlara təhlükəsiz alternativ ola bilər. 2-ci mərhələ klinik sınaqlarının nəticələrinə əsasən, bu “yağ əridən iynə” tək bir inyeksiya ilə inadkar qarın yağlarını əhəmiyyətli dərəcədə azaltmağa nail olub.
ABŞ və Avstraliyada aparılan araşdırmalarda CBL-514 inyeksiyası alan iştirakçıların 69,6 faizi nəzərəçarpan dərəcədə yağ itkisi yaşayıb. Plasebo qəbul edən qrupda isə heç bir dəyişiklik müşahidə edilməyib. Daha da maraqlısı, xəstələrin təxminən 43 faizi bu nəticəni cəmi bir inyeksiyadan sonra əldə edib.
Calliway Biopharmaceuticals şirkətinin hazırladığı bu dərman yağ hüceyrələrini məhv edərək bədəndən təbii yolla xaric olunmasına şərait yaradır. Cərrahi əməliyyatlardan fərqli olaraq, CBL-514 toxumalara zərər vermədən, infeksiya və çapıq riski olmadan təsir göstərir.
Tədqiqatda iştirak edən mütəxəssislər bildirirlər ki, preparatın yan təsirləri minimal olub – əsasən inyeksiya yerində yüngül ağrı və şişkinlik müşahidə edilib, lakin ciddi fəsad qeydə alınmayıb.
Alimlər bu nəticələri “yağ azaldıcı müalicələrdə yeni səhifə” kimi qiymətləndirir. Əgər CBL-514 son mərhələ sınaqlarını da uğurla keçərsə, liposaksiya dövrü həqiqətən tarixə çevrilə bilər.
Tərcümə: Könül Oruc
